香港新浪網 MySinaBlog
吳鈞洋 | 21st Nov 2008, 10:56 | 兩岸點滴 | (747 Reads)

吳鈞洋師傅網站   www.ngkwunyeung.com.hk

    評論略有名氣人物「天真無牙」……唉喲!對不起,個牙字寫漏了耳仔旁、應該係「邪」字至才對。臺灣阿扁叔認了第一冇人敢認第二。原因係扁叔「天真」地認為總統貪污係理所當然事,絕對不應該構成罪行,事關總統係「國家」領導人,國家係「國」連埋「家」,亦即係話:「國」之所有、份屬總統「家」之部分。如是家人將國之財物納入總統家當何罪之有?!到咗今時今日棚尾拉箱去位而旋即成為階下囚的扁叔、為此深深感到委屈而進行「絕食」、以抗議馬英九政治迫害。

    莫管真迫害抑或假迫害,響臺灣、基本上已做到天子犯法與民同罪,話之你係「隔夜」總統、一樣要入冊。

    呢種事情如果發生在大陸絕對匪夷所思(根本冇可能發生),莫講話去郁那個去位咗幾年嘅冧巴溫矣!就連廣州市長「陳村糭」張廣寧都冇人夠膽模下佢。或者有讀者問:「究竟張廣寧犯咗乜春罪呀?」,可以答你:「佢就算貪污查無實據,但問責方面卻罪無可恕!」

    嗱!其他罪狀第日至公開,單係「廣州市公證處」公然由公證員帶非華僑到鄉間辦理偽華僑公證以領回被改造私房……一條間責罪就夠佢摘下頭上烏紗。又算俾佢打甩呢條罪啦!至於關係到國家既定「房屋改造政策」而有人蓄意竄改從中圖利,事成之後身為市地方「公檢機關」,「僑務部」,「國土局」…等等有關人員竟然裝聾辦啞而「咋帝」視而不見,見而不問。做市嘅阿頭之「陳村糭」張廣寧你話係唔係犯上縱容疏忽罪而抵拉去打耙?但E家唔係噃,非但條粉腸冇罪,聽講仲受表揚添!

    有目共睹,我都唔知如何落筆評論好,試問目前全中國各省市領導有幾多個清廉架?響我們親愛的祖國有眼睇:越早退下之「大媽洒」越係安貧樂道修身養性在等死,越遲引退嘅「小官吏」卻是腦滿腸肥享受人生求長壽。


吳鈞洋 | 8th Nov 2008, 22:48 | 術數雜論 | (641 Reads)

吳鈞洋師傅網站   www.ngkwunyeung.com.hk

    「健康膚色」美男子奧巴馬成功當選美國總統而快將入主白宮,佢之當選雖然未算得普天同慶、但在現總統布殊盡失人心之情形之下,至低限度響美國算得上係眾望所歸。吳鈞洋的文章「媽叉」布殊足八個年頭也係人所共知,對奧巴馬抱有一定的好感係毋庸置疑的(擺出嚟成張「發靚」金漆招牌笑臉幾有睇頭,相比起「射厘眼」的布殊仔好睇好多)。另一方面,佢做白虎國度總統、更加有「黑白配,男仔女仔配」陰陽調和之玄機透露。
 
  

    講到「黑白配,男仔女仔配」讀者或許覺得似曾相識咁……,有乜奇嗻!電視上男女玩「包剪耷」嗰個廣告日日都睇慣睇熟啦。「男仔女仔配」本身已經係「陰陽乾坤」,加埋「黑白配」更加呈現出一幅「太極圖」(白中有黑點,黑中有白點。陽極陰氣滋長,陰極陽氣萌生)。我哋中國人乜都講太極陰陽,呢種理論絕對經得起科學驗證而非迷信。唔信?大可以研究下自己點樣嚟嘅、自然對陰陽有進一步認識。

 

    日常生活中,最普通常識係:男主剛女主柔,男陽剛女陰柔。唯獨是男子若然純陽剛而女子純陰柔的話,就會顯得物逾其度而走向極端;男子會成為令人生厭之老粗,反之女子則淪為只供人糟質之尤物。換而言之,陰陽失調者一如所謂之:「孤陰不生、獨陽不長」,最終必然係人生之敗筆。 

  

    國家也一樣,玄學理論上,視東方有色人種國家為青龍壯木,猶其中國為首,青龍壯木奉行中庸,陽剛之氣不足,自古提倡格物致知 

修身、齊家、治國、平天下之道。視西方白色人種國家為白虎銳金,猶其美國為最,白虎銳金屬陽,全無的多陰柔,素來以帝國主義而自詡,崇尚武力而到處蝦蝦霸霸。

    如此一來,陰柔中要有多少陽剛先至有陰陽闢合性滋長,以國家嚟講,亞洲國家必須引進西方文化、科學、技術……等等才能蛻變成強國。同樣,西方國家除咗容許女性執政外,以美國而言,E家由「健康膚色」美男子上臺做總統係最有建設性,用個大象去睇,恰似呈現出一幅「太極圖」(白中有黑點,黑中有白點。陽極陰氣滋長,陰極陽氣萌生)。現實解釋:白人國度出現一位黑人總統咪正好驗咗「黑白配」嘅陽中有陰之「調和數象」囉!有咗陰陽肯定脫離「獨陽不長」的自我性行為,至少唔會周圍去蝦蝦霸霸。