香港新浪網 MySinaBlog
吳鈞洋 | 13th Jan 2009, 18:18 | 一般 | (378 Reads)

吳鈞洋師傅網站   www.ngkwunyeung.com.hk

    四川大地震,豆腐渣工程建成的學校壓死咗不少可愛的「人仔」,冇幾耐又因三聚青胺奶粉食壞咗更多趣緻的「人仔」,天公無情、年內極其猖獗之流感病毒又傷害到大部分無辜的「人仔」。到咗最近香港東區那打素醫院殮房遺失嬰屍、又累警方勞師動眾去垃圾堆田區搵「人仔」。另一方面,整個鼠年西方國家都針對中國貨幣「人仔」升值問題對後者施加不少壓力,臨近年終嗰頭市面又話充斥着大量假「人仔」……。總之艮土八運遇上「戊子」歲而令艮土「人仔」犯伏吟,舉凡因「人仔」惹起的事端、又或事端引發而導致「人仔」受到的禍害,恐怕冇咁容易平息或化解得完美無瑕。由於E家係「人仔」艮土八運,只要睇下流年係乜東東化忌,則個瓣一定衰硬,好似牛年「文曲化忌」,整年若非驗數於「人仔」學生鬧事、必然應於學府鬧醜聞,再不然又有「不知名」病毒在學校蔓延致禍。至於「人仔」會唔會在牛年貶值?哈哈!E家說起來似乎有些兒「天方夜譚」味道呵


吳鈞洋 | 2nd Jan 2009, 17:09 | 術數預測 | (487 Reads)

吳鈞洋師傅網站   www.ngkwunyeung.com.hk

    最近成日聽到政府班高官輪流發表好似煙仔盒上嘅忠告,警告話明年經濟十分之唔掂。(呢一招我哋啲行家用得最多:一味靠嚇跟住問錢做嘢,好起嚟歸功自己,衰咗賴佢時運低衰到貼地)。唯獨係政府咁老實則好少見,「老實話」聽得多也令人好生沮喪、甚至踩着芋莢當蛇,小小事情也不自覺驚青起嚟。所以話長期生活在壓力之下,頂唔順嘅話分分鐘自尋短見並非奇事、否則也會發生「神經線短路症候群」。我舊年預測咗今年精神科醫生普遍好環境,有個醫護熟客報料話的而且確珍珠都冇咁真。

 

    我雖然唔係精神科醫生或心理科專家,但係客路也明顯比去年同期增加咗幾成有多。有客人不知是有心抑或無意地打趣問我,生意好唔好得過精神科醫生?我不能有所選擇地答佢話,起碼拍得住、甚至超過。事關精神科醫生生意好得交關對社會來說、係出現咗一個非常危險之訊號,民眾若然聞得我哋生意不及前者,或多或少會產生「隱藏性心理恐慌症候群」。所以我哋有必要在真亦假時假當真地作大叻過前者以「安定民心」,否則社會肯定大亂(一笑)。

 

    閑話說過言歸正傳,內子個親戚半咕嚕乘咗龍大大話都有半年,上次佢獨自回來冇帶埋隻乸,激到老而不(大編輯)呱呱叫話佢「無印良品」。今勻特登打電話警告,若然再見公不見乸嘅話實行朋友都冇得做。如是者瞬息間又到了冬至,呢日傍晚半咕嚕一早去茶樓霸定位等我和老而不,同來的自然還有鄧太山東妹子呢,嘻嘻!半咕嚕豈敢再打單泡獨自來乎。……

 (閱讀全文)