香港新浪網 MySinaBlog
吳鈞洋 | 23rd Mar 2009, 18:54 | 術數雜論 | (498 Reads)

吳鈞洋師傅網站   www.ngkwunyeung.com.hk

    2007年在「香港股神」預言恆生指數有機會破X萬點嘅同時(唔叉記得股神嗰陣預測之點數),報章「戲劇性」地爆出「陳振聰」個大名。有不少讀者、親戚、朋友……問我識唔識得呢位熱爆(行家),對於即將爆發的〔龔如心遺產〕爭奪戰又有咩玄機預測以益大家?我當時答道:「和大家一樣、除咗由傳播界耳濡目染之外,以前從未聽過呢位仁兄之大名、更遑論認識矣!」,對於我嘅答覆好多人不滿意:「唔係噃!陳振聰以前係風水佬喎,你冇理由唔識架?」,答:「好奇咩!佢有錢而我窮,佢懂得法術而我唔識,仲有係陳生話佢唔係風水佬喎……」。至於要我預測「龔如心遺產」爭奪戰的結果,也由於當時靈感空虛之故,一時間未能瀟灑自如觸機判事……雖然係咁,也提供咗一個「無厘頭變字遊戲」畀大家開心,算係有所交代。   

    橫掂講開咗全城最熱門的(遺囑)話題,就隨手捻起「華懋」二字作「變字遊戲」的開始吧!「華懋」兩個字,「華」係公,「懋」係乸。就當個公(消失)了而留低下隻乸在世。變字開始首先必須將個公所屬「華」字上面之「草花頭」摘下而配套上個「懋」字應用(遊戲規則不容許不用)。不用猶是可,一用就有「戲法」變出……,大家落足眼力睇噃,嗱!是否見到個「懋」字拆開咗變成了「茅」「木」「木」「心」四個字?大家一定對「木」字加下面個「心」字似曾相識?不錯,正是個「想」字,兩旁雙「木」加一「心」本來就係兩個「想」字,亦可以喻之:左「想」右「想」。唯獨現在個「想」字卻不成字,究其原因大家明眼可以見到係個「茅」字做了(障眼)功夫而硬將雙「目」蔽去,既然缺了「目」又如何能成「想」字呢?是以:左既難成「想」右亦不能成「想」,縱使有「心」亦無法成「想」〔說到這裡忽然醒起2007年(丁亥)紫微斗數也是(刑忌夾印):一旁天梁、一旁巨門化忌夾(天相)、恰好是有(木)而缺了(目)〕。再看「茅」兩旁雙「木」,左「十八」右「十八」合共「三十六」。「三十六」者大家耳熟能詳自然聯想到「計」字,更加會聯上個「茅」字讀、讀成「茅計」或「計茅」甚至「茅術」。「三十六」計我不諳熟,只記得其中最後一計是「走為上着」。再個「心」字,由始至終不管上面如何變法,下面個「心」字都沒有變、同是「三點」聯結而成一「心」,若然個「心」字一變的話,「變字遊戲」就肯定要結束矣。

    未睇過原文嘅讀者覺得這個「無厘頭變字遊戲」好唔好「玩」呢?有時間自己也可以將一組字拆開來「玩」兼且自由發揮想象力。若然問我當中是否含有玄機或影射?我E家再答你:「我話冇你信唔信呀!」


吳鈞洋 | 13th Mar 2009, 23:40 | 術數預測 | (441 Reads)

吳鈞洋師傅網站   www.ngkwunyeung.com.hk

    依稀記得毛澤東以前填過一首叫乜春「崑崙」嘅詞,最尾幾句好似係:「如今我謂崑崙,不要這高這多雪,安得倚揮寶劍將汝裁為三截,一截遺歐、一截贈美、一截留中國,大同世界環球同此涼熱」。毛澤東死咗得以被封「鬼王」不無他過人之處,歐美遲早走「共產」佢早在幾拾年前已經預測到。大家有目共睹依家個美國總統其施政路線正亦步亦隨毛澤東時代的社會主義步伐行走。嗱!記唔記得當年「公私合營」呀?國家入股私營企業,一個屁股duck入嚟……企業老板從此變成無產階級。最近奥巴馬也逐步取締資本主義私有化,之不過手段比毛澤東有人情味得多,至少有資金注入買起私營企業資產。全美企業將逐漸國有化的進程是不容改變的事實,如果咁都否認係走「共產模式」嘅話,咁就直情自欺欺人矣!……

 (閱讀全文)

吳鈞洋 | 2nd Mar 2009, 23:07 | 術數預測 | (305 Reads)

吳鈞洋師傅網站   www.ngkwunyeung.com.hk

    今年都幾奇怪wo,新正頭已經咁叉熱,難為我哋呢班「有份量」人仕,終日付出多收入少(汗流夾背兼冇胃口),有時真羨慕班「涼血族群」,點解人家冇汗流呢?嗰日出街食完晏行緊返公司,邊行邊忟憎自己「收支不平衡」問題,又用欽佩眼光下仲大件細件裹着身嘅男女,如是者越諗越激氣……

    「跌咗錢啦,四眼佬!」聞得有人大聲叫,於是乎慌失失向地上搜索、並且禮貌地揮手連聲說「唔該!」。然則塊地不知幾乾淨、廢紙都冇張,正在納罕間、抬頭卻見老而不條粉腸戙在面前望住我瞇着眼笑。「揾到着數咧,開心啦、死老而不!」我橫了他一眼嗔道,「冇,見你頭耷耷唔知諗緊乜,提醒下,驚你撞倒啲靚女就唔好啦,嘻嘻!」老而不烚熟狗頭般答道,我笑駡道:「睇見你副衰樣就打泠顫……想去邊呀?」,答:「正想揾你……」,我笑笑口答道:「好似冇乜着數畀你揾噃?」,老而不佯作怒狀:「超!你幾時有着數畀我揾過?有都係我益你多。」,我笑道:「咁又係,之不過你益來嘅都係鹽倉珍品居多,唔係點啱使。」說到這裡大家相對哈哈大笑。…… 

 

 (閱讀全文)