香港新浪網 MySinaBlog
吳鈞洋 | 9th May 2010, 21:32 | 術數預測 | (627 Reads)

吳鈞洋師傅網站   www.ngkwunyeung.com.hk

    立夏後做到隻狗;又造陰又睇陽、又去山東又去惠東……差啲仲去見埋毛澤東……,「若然真畀我見到毛主席嘅話,咁就過乜癮囉!幾大報串,大大鑊咁煮班契弟一餐,猶其係廣州嗰喳……」

     嗰日中午得閑無事,越諗越覺得意,摸摸下杷……咦!濕濕哋嘅,嘻嘻!原來開心得滯滴起口水嚟添!與此同時門鐘忽然響起,響聲零舍怪雞、一下長兩下短,唔使問阿貴、肯定係死老鬼!「真係你呀,老……編輯」冇估錯,開門真係老而不,差啲開口夾着脷……嘻!老而不用眼尾睥咗我一下:「哼!使乜改口啫,中意叫咩咪叫囉!」,我答道不敢,並且異常殷勤招呼佢老人家坐低……「得喇!懶殷勤咁,有乜交叉企圖呀?」老而不望住我陰陰咀怪笑道:「超……人!自己連乜叫止蝕都唔識,竟然學人去做股評家,笑鬼死!」,我聞言「紅都面哂」,咿咿哦哦地顧左右而言,「面對現實……講明估市嘛,乜都可以估!真正股評家邊有你咁蠢、實牙實齒去評個市升跌啫?人家有乜水唔用天文臺術語……」,聽到呢戍我不禁打叉問道:「咩叫天文臺術語?」,「嗱,聽住囉噃!吹和緩至清勁東南風、後轉西北風,普遍天晴,間中有雨、雨勢有時頗大、並且有狂風雷暴,濕度60至95……咭,你話係咪乜叉都係佢講哂!」,「邊學到呀?唔怪得古老有云:天文臺冇句真」我聞後搖頭苦笑:「大佬呀!我嘅預測真正用五行算,佢哋造市係出蠱惑……」,老而不不屑地瞪了我一眼道:「你咪理,總之升跌嘅結果你在明佢在暗,測市衰咗受靶嘅係你,關佢哋叉事!你不妨講下你測立夏後個市會升之理據?」,我不忿氣地接話認真說道:「有個好有慧根嘅網友舊年起咗個(炳)字測市,由頭到尾未曾衰過。所以今年沿用番此卦,斷估立夏後火進氣、庚金劈木而生火,邊會衰架?!」,老而不笑着答道:「火剋金先抑或谷指數先?」,畀佢係咁一問,當堂打咗個突!老而不懶焦積道:「你在立夏風水有寫道:五行乙木壯旺、唯獨立夏火炎之極,地支雖有亥水卻會木拱東方而蒸干殆盡,辛金不知死活劈向乙木而激起丁火、旺火沖天而剋無根之庚辛金,烈火自然熔金焚鐵……既然自己都識話烈火熔金焚鐵,咁唔識得斷佢衰歐美在先、再谷起指數在後……還有呢?」,聽到呢度不禁汗顏、自覺無地自容:「點解我咁蠢呢!」,答:「不嬲啦!」,我矋咗佢一眼:「文昌化忌文曲化科,擺明出蠱惑……但到摸唔清佢造勢升市先、抑或質低個市先再谷番起佢?」,老而不印着腳、用牙簽裝模作樣了著煙屎牙,睇見佢就把鬼火、宜得揼佢一身……接着道:「你都short嘅!擺明出蠱惑、就梗係裝彈弓喇,特登整個假象:中美高層接觸,等你班懵仔以為鴻鵠將至……或者真有嘢斟過,就係斟酌點樣佈局裝班羊牯,哈哈!」,經老而不一點,恍然大悟:「等羊牯劈哂貨,佢哋又入叉飽喇,嗰陣啲真嘢至出籠。我真蠢,點解唔將立夏二字換成夏天呢!」,老而不住瞇著眼棚起朋煙屎牙笑話:「人哋叫你做大師,其實大帥至貼切,事關你頭頂入面少緊一塊……哈哈哈!」,畀條粉相係咁取笑,個心係咁不停戚住戚住、好唔舒服,但又冇法:「呢個月巨門化祿加天梁而財蔭夾天相,逢相看府、天府化科,明眼看直情益股市架!」,「我冇話你預測錯噃!只係覺得你捉到鹿唔識脫角,同時響不適當時候講不適當說話」,老而不施施然答道:「仲有呀!你自己有提到,雖然呢個月二五交加打孖嚟,唯獨八、九財星入中宮、飛西北而疊吉……但係你冇理由忽略咗整條東北、中宮、西南軸心二五交加殺傷力有幾大架!

    講到呢戍、我成個人謝哂!不由得不服老而不為人細心並且世故,笑就笑佢肥佬肥膻膻、買舊豬肉去拜神……但講到精明處,佢叻過好叉多人,否則點會做到大編輯喎!