吳鈞洋師傅網站 www.ngkwunyeung.com.hk
（7月22日）辰時左右，由印度開始，繼而中國大部分地區，最後到日本….等等亞洲區域（包括香港在內）都看日全蝕或日偏食景象。一早已經有人問我，似今次500年才一遇最長時間紀錄嘅日蝕奇景，其玄機對於世界來說、究竟係吉抑或凶？
依我嘅睇法係：平民百姓無咎、惟帝皇將相肯定多事。
呢日大清早剛梳洗完畢，即收到偉哥（紫微梁）來電善意忠告：「喂！日蝕8點零開始，以你本月加上今日個太陽坐正響午垣重疊祿科權會齊而光到離譜，響電視睇下日蝕以驗化忌對你嚟講係百利而無一害！」，人一世物一世，咁難得嘅奇觀，唔使偉哥佢提點我都會睇個清楚啦！不過我都好生感激佢嘅熱心熱腸。講開又講，我斗數個太陽真係duck正響午垣而烈日中天，老實話，化忌或多煞星會中和多少而使之冇咁光、的確係好事。不過話又得說回頭，嗰啲命中守陷宮嘅太陽又點計數呢？斷估唔會人人有難啩！諗諗下箇中玄機、自己也不禁好笑起上嚟。……
睇完今世唔知再有冇機會look嘅天文壯觀之後，返到公司坐低還回味着太陽祿忌嘅問題，冇耐、門鐘忽然響起，諗下……冇約人呀，乜誰呢？除咗佢之外、斷估都冇邊個咁早會嚟搵我嘞。開門果然係佢一老而不，「咁錯檔呀！大編輯」我笑笑口打趣他：「今朝狗咬呂洞賓，你老人家冇事嘛？」，老而不瞪着眼回道：「又關我事？」，我陰陰笑答道：「冇人屈你，係你自己話係純陽托世架！」，「純陽又點同呂純陽呢？我標榜自己係純陽正氣之人之嘛！」老而不不屑地指着我笑道：「今勻食日嗰隻係狗顛嚟架！因住你那話兒畀佢擔咗去，哈哈哈！」，「天狗食日，狗咬阿賓，犬噬純陽……嘻嘻！你條友……」我說着說着；忽然有所捉機：「咦！老而不，玄機到矣，狗咬阿賓，犬噬純陽……亦即係條（犬）咬了那（東西）而起變化化出了個（太）字」，「咁都得？你條粉樣乜都可以捉機，佩服佩服！」老而不向我拱手而扮着鬼臉：「隻衰狗擔了個日收埋咗響下面……騎騎騎！」，我被老而不嗰副怪模樣弄到笑不回氣，略停一陣過後，老而不道；「好啦！，言歸正傳，你既然用魔法將隻犬變成了（太），咁有乜預測吖？」
我用筆寫了個太字之後，施施然對他說：「一人張開大髀而走光、謂之太字。浮光躍金、静影沉璧謂之：映字。前者明顯偷天換日，後者直情虛無飄渺。今年流年本來已經火虛土弱、金寒水冷，再響大暑前一日大象出現天狗食日，咁搞法天地更顯得陰寒肅殺、日月無光」，老而不聞後不禁點頭嘆息道：「未來相信：風災水患，地震海嘯，礦坑倒塌，冧樓爆炸……等等災難將一波疊一波，引用你老吳名言（單單新鮮鑊鑊甘……）哈哈！」，我搖頭苦笑接話：「仲有係舉凡大人物，越大越應數，個名有：日、明、光、輝……等等部分嘅人、特別係男人，多數有難。」，老而不伸伸舌頭道：「好彩冇我份……」，我繼續說：「火虛土弱、金寒水冷，加上世情虛無飄渺，未來股市、樓市……等等投機市場有如鏡花水月得不到實質數據支持利好，斷估立秋後會有一次似模似樣大調整，猶其股市，有貨在手嘅散戶要小心在意矣！」，講到呢度，老而不又再顯出佢知少少扮代表之焦積本性：「嗱！今年剩低嘅日子，受影響最大嘅當數太陽帝國「日本」嗰個歪咀佬首相，大選若過得骨嘅話我一定去為佢挽鞋……」，說到這裡我打斷他笑着噴了他一口：「你夠班咩，肥佬？」，老而不聞後扮了個鬼臉以解嘲。我微笑而接着說：「我恐怕北韓嗰個粉樣主席金正日唔知過唔過得今年，事關佢年內除咗天狗食日外……仲有文曲金化忌添！還有伊朗今年內應該仲有排亂，知唔知咩玄機？」，老而不快口答道：「因為佢哋係拜火（明教）嘅發源地！」，我微笑點頭對老而不說：「孺子可教！」
