香港新浪網 MySinaBlog
« 上一篇 | 下一篇 »
吳鈞洋 | 8th Jun 2013, 21:51 | 術數雜論 | (436 Reads)

吳鈞洋師傅網站 《香港占算網》吳鈞洋大師親算

打從多事六月之後,所知老而不就未曾得閑過,一如佢口頭禪話齋:「單單新鮮、鑊鑊甘」,點解釋呢?講到尾都因為近年來黨派不斷分裂蛻變,單係泛民就分裂出拾幾個增生組織、快過癌細胞擴散,攪到出位行動頻頻、抗爭新聞多多。此無他,組織和社團一樣,話事人老咗自然求安定、唔想攪咁多嘢,既已得益肯定不會太積極。如是者,泛民元老大多諗退休揾下臺階甚至向中聯辦献媚。至於「新紥」嘅年輕人不嬲視泛民組織為合法社團、必然如狼似虎博上位。若然原來組織不容納,自然另起爐灶玩大啲。特別近年嘅六月份、廿多年前北京學生運動,依家香港學生一脈相承有樣學樣。

「六四」咁啱係老而不生日牛一,天矇光先至響中聯辦返歸,冇耐又接到柯打要趕入大嶼山嶼南道採訪連環撞死牛離奇車禍事故……忙到連自己生日都忘記咗。難得老友一塲、有今生冇來世,幾個老死夜晚請佢食飯慶祝牛一,正宗「係牛八死難、唯一生還」哈哈哈!

 「老而不,飲杯勝嘅!祝你牛一快樂!健康如牛……」偉哥一見老而不即刻鬆毛鬆翼一輪咀,「多謝!多謝!咦,係偉哥呀……最近瘦咗喎!係咪恃住啲偉哥唔使錢買而日日(李旺陽)……」老而不說話引得大家一陣開心。喱個時候輪到老B講嘢:「不哥,牛一講牛,薛仁貴征西吞咗九牛二虎而力大無窮。家陣八牛一虎……呵呵呵!吉兆,吉兆……」,「講嘢呀,老B!你哋北方話話人吹牛叫吹牛B,家陣死咗八隻有排你吹,係咁吹……吹到你旺陽、哈哈!」老而不笑指老B邊說邊打話:「你又知唔死八牛嘅預兆吖?」,講到呢戍輪到經紀陳答咀:「咪話,一個鬼婆揸車可以撞死八隻牛,斷估健力士大全未有過紀錄,我真係想知多啲……」,老而不附和經紀陳說話:「橫掂今日大家躉我開心我好生感恩!呢戍除了偉哥和老B之外我地三個都識術數,不妨各抒己見,集思廣益……猜下喱單嘢是吉是凶、又有乜玄機。我先献醜了:癸巳年香港東南地域(辰巽巳),立夏巳月將盡、芒種午月交替,仲夏火旺炎上,香港西邊大嶼山白虎地(申酉戌)、西婦(未坤申)揸車撞死丑牛(丑艮寅)……」,經紀陳接着話:「結果死了八隻牛、應驗了東南地域之西邊出咗事嘅大象。」,輪到我說話了:「八為艮卦((丑艮寅),鬼婆(未坤申)。也驗證咗丑未相沖,導致【巳酉丑】金局沖破。凶兆係西南沖東北:世界西南地方和東北將有天災人禍、甚至戰爭發生,首當沖沖係世界及任何國家地域之西方、西南方位。大嶼山年內將有大把牙煙事發生。」,此刻經紀陳又有玄機觸及:「咁亦預兆咗金局解體,國際金融組織畀女人攪(喎)……我豎起手指公向經紀陳表示讚許:「哈!經紀陳第六感幾強……,老而不射喱著三角眼有多少唔抵得,口噏噏自言自語:「第六感強咪即係黐孖筋……」,經紀陳個人不嬲都幾有量度,聽到說話係咁笑笑口望咗老而不一眼不發話。反而老B唔抵得老而不嗰種態度,躉經紀陳不值而對佢出言相謑:「經紀陳雖然黐孖筋……但人家響社會有身份,至少入到中聯辦、曉明哥不敢冷待。至於你老而不好人好姐一個,敢唔敢單獨去行花園街吖…… 」老B一番說話直情觸及對方心坎深處,也引來大家一陣會心笑聲。睇見老而不臉色不太調和,偉哥識做拿拿淋支開話題:「老吳所指牙煙事莫非又係迪士尼和昂平360?」,我聽後不禁有啲心寒,答道:「講到明金局解體,即係乜叉機動嘢都有機會出事生意外,何止昂平360。」,老B他他條說話:「咪預兆到金正恩條仆街被刺,仲有美國擱置軍事援日計劃……」,經紀陳矇矇眼接話:「老B你好嘢,咁多敏感題目被你一一道出。之不過最令我擔心嘅反而係(丑艮寅)……話音剛落,我和老而不不約而同嗌出:「東北!」兩個字。

眼見壽星公老而青不我禮讓不發言,條粉腸也(當人不讓):「(丑艮寅)丑寅中間夾住艮,艮八少男年輕人……」,我接話:「芒種月最不利的方位是正東居首(月令五黃被年五黃星居中激盪煞氣),其次是中宮(年五黃沖起月令七赤戰星) ,再次是正南(受中宮五黃激盪煞氣) ,東南有瑕疵(46金木相戰)。世界上以正東,正南方和中宮地域國家在農曆四月下旬小滿後到芒種後都有災難性發生。只不過今個月發生嘅災劫禍害,比起上個月有過之而無不及,事關火旺方混局,燒焦八白土剋金再焚木……意料東海風雲起變數,中東非洲最糟糕,東北動亂合玄機,災禍連綿焦艮土、剋細路…… 

說話觸動了各人神經深處, 其實今年「癸巳」干支擺明「戊癸」暗合化火,夏天有火助化則化合成功,秋冬金水俱旺則化不成,既然合而不化就成了「土剋水」,亦同樣係「土剋子」,「土剋子」。2008年「戊子」在四川大地震中過萬學童被瓦礫活埋慘絕人寰的一幕大家已有目共睹、並且哭乾了眼淚……,之後發生的「三聚氰胺」加入國產奶粉而毒殺兒童事件也是「土剋子」,事關「三聚氰胺」歸納入土之化學成分,從電視機中看到萬千計徬徨的母親抱著嬰兒焦急地輪候診症,看到她們一臉無奈及無助的神色,眼中淚水不禁往肚內流……

希望歴史不會再重演!


[2]

你好吴大师。无意中见到贵博。大陆天空现2个太阳。加上共党共3个太阳。吴大师能透点天机吗?


[引用] | 作者 屎落櫈 | 23rd Jun 2013 11:41 | [舉報垃圾留言]

[1]

早晨吴师傅:大陆东北几把火,烧死120人。福建又汽车爆炸死47人。你又有何高见?老而不一出,又有好帖


[引用] | 作者 billy | 9th Jun 2013 00:43 | [舉報垃圾留言]